Geniet hierdie bedekte Noord-Afrika hoender saam met die heerlike konfyt.
Bereiding: 10 min.
Verkoel: 30 min.
Gaarmaak: 30 min.
Genoeg vir 6 mense
60 ml (¼ k) olyfolie
30 ml (2 e) suurlemoensap
30 ml (2 e) harissapasta
2 knoffelhuisies, fyngedruk
sout en peper
6 hoenderboudjies
6 hoendervlerkies
boneslaai vir voorsit
Murgpampoentjiekonfyt
4 suurlemoene, skil en sap
800 g murgpampoentjies, geskil en in blokkies gesny
500 ml (2 k) suiker
8 cm vars gemmer, gerasper
- Meng die olyfolie, sap, pasta, knoffel, sout en peper in ’n groot mengbak. Voeg die hoender by en bedek goed met die harissamengsel. Bedek en verkoel 30 minute in die koelkas.
- Verhit ’n roosterpan oor matige hitte. Rooster die hoender 15 minute terwyl jy dit gereeld omdraai tot heeltemal gaar.
- Murgpampoentjiekonfyt: Plaas die murgpampoentjies in ’n pan met 30 ml (2 e) van die suurlemoensap. Kook sowat 10 minute oor matige hitte terwyl jy dikwels roer tot die murgpampoentjies deurskynend en sag is, maar nie pap nie.
- Roer die suiker, oorblywende sap, skil en gemmer in. Roer tot die suiker opgelos het.
- Bring tot kookpunt en laat prut dan sowat 10 minute of tot die murgpampoentjies heeltemal sag en die konfyt verdik het.
- Plaas die hoender op ’n platbord, strooi pietersielie oor en sit voor saam met die murgpampoentjiekonfyt en boneslaai.
Deur Hope Malau
Foto: Jacques Stander